前提

係日本生活第6年，唔算長亦唔算短，但可能比其他在日香港人經歷多少少。日文學校，打工，搵工，社畜、結婚、生bb、無職湊b、確定申告、復職到而家青色申告。

嚟日本之前，我自學考咗N2。雖然覺得自己多少有啲底，適應都係時間嘅問題，不過實際上環境唔會等你，你會被迫去學識點樣係日本生活。

如果你有返咁上下日本底，你當然可以去問人，上網去search吓其他同路人嘅分享。咁你就有可能睇到我呢個blog。

如果你想係日本生活，一係你日本底有返咁上下，一係你有大把錢，或者你有時間去研究好多煩複嘅手續，如果你樣樣都無，請你放棄日本，揀過其他地方好過。

一路以嚟都想寫吓嘢，但寫日文、中文或者英文都好，網上已經有好多sample，我再寫一次都無意思。諗起自己嘅情況，上網係搵到好多case但就好少同自己差唔多嘅例子。可能有但我搵唔到，所以就自己寫。當然唔可能同我完全一樣，不過多一個參考。

時代會變，我寫嘅時候喺2020年，但我嘅經歷喺再之前。我寫嘅時候多少都會check吓都唔代表啲嘢一定啱用，所以如果你跟我寫嘅做但唔得唔好走嚟問我，我唔包成功，因為我無收你錢！

一路寫只係覺得自己組織能力好差，多謝你晒咁多時間聽（睇）我費up。我寫blog都係希望自己唔好唔記得廣東話，同埋打發吓時間。