喺日本生bb (出産) Part 1

如果你已經有咗而只可以喺日本生，咁你就只可以準備。如果你諗緊生唔生，或者可以揀喺唔喺日本生嘅話，希望我下面寫嘅嘢可以俾到你一個參考。

大前提

1. BB唔係你想生就一定生到，可能因為身體狀態而致受孕困難或者不育（不妊)。日本而家不育治療可以claim保險，負擔會少咗，但應該都唔平。

2. 就算有咗（妊娠)都未必代表一定駝得穩，孕婦其實大概有一成人會流產，未過3個月安定期都係小心啲好。
如果不幸流產，身體上心靈上都需要時間康復，亦會多咗好多經濟上負擔嘅同時又做唔到嘢。

3. 就算無風無險生到出嚟，bb重細嘅時候有可能因為不明嘅原因死亡（新生児突然死)

4. 以下寫嘅都係基於健康情況吓生嘅單胎bb，如果喺多胎或者出世前後已經有先天性嘅病，情況又會好唔同。

5. 由駝b到要湊大個b其實真係需要好多錢。你而家住緊嘅地方如果唔係自己買嘅，有機會唔俾你湊細路。

6. 有咗果時好多檢查、預防針都唔做得打得，所以提前要準備好。

7. 有咗之後到小朋友到咁上下大之前喺無咩時間可以去旅行去玩，生之前最好玩盡先。例如浸溫泉，唔同旅館都會有唔同規定，要個別問亦可能要醫生批准，駝緊6-8個月到有機會可以去。

8. 老公唔幫手湊b喺其中一個離婚嘅原因之一。夫婦之間嘅感情夠唔夠深厚都係重點。

如果需要搬屋

生咗bb之後，照理好少會再搬嚟搬去，所以搬去邊度住真係要考慮清楚。

搬去邊要考慮嘅因素因人而異，普遍嚟講
1. 個人喜好
2. 當地嘅育兒、教育、對移住者嘅支援（子育て・移住者政策）
3. 生活水平
4. 附近有冇人可以幫手
5. 治安
6. 同公司嘅距離
更長遠嚟睇，校網同果區嘅小朋友嘅學習能力等等。

有啲網站會總括唔同地方嘅政策，會比較容易揀。原則喺生活費高嘅地方，可以俾你嘅資源多啲，但稅又會重啲，所以都係羊毛出在羊身上。
一啲偏遠嘅地區為咗吸引移住者會俾好多支援，但係咪真係可以喺果到生活就要睇返你自己嘅情況。

住宅嘅種類
1. 屋宛 マンション Mansion
一般指比較大型嘅集合住宅，通常會有管理員。
2. 大廈 アパート Apartment
單位層數比較少，通常大概3層高。
註﹕係日本31米以下(6層)高嘅建築物係無規定一定要有𨋢。所以呢種住宅好大機會係無𨋢。
3. 一戶住宅 一軒家
呢種係自己起，普遍最多為3層。
另外當然有其他種類，但最常見係呢3種。

外國人要係日本買樓(因應個人情況)通常都唔容易。
除非你夠錢俾晒全費，要做按揭係有難度。

如果只講湊小朋友嘅話，3. 一戶住宅係最好。
小朋友走黎走去會有好多燥音，好容易俾人投訴。
但如果發生地震、水浸嘅時候，財物損失有可能會好嚴重。
不過可以自由決定內裝，唔駛要人批准，但維修保養要自己負責。

要買定租，各有各好，因應返自己嘅情況同能力去決定。